Tematica : vita ecunomica è suciali

Assi 1 : una cultura pasturali

Maccu Mahò p 1 à 3 (« ch’ùn si sà micca).

Ughjittivi :

• studiu literariu : principiu d’una opara, prisintazioni d’un parsunaghju
• studiu linguisticu : a lingua di Dalzeto : gallicisimi ?
• cultura : suldatu è paisanu
• attività urali : littura
• scrittura : sintesi
• scrittura criativa : discriva un parsunaghju
• traduzzioni in francesi

Altri ducumenti d’appoghju :

• Arrighjistramenti d’agricultori o d’anzianu suldatu
• Emile Bergerat, La chasse au mouflon, Mémorial des Corses, tome 6
• Diderot, Jacques le fataliste.

Cumentu :

U parsunaghju di Maccu Mahò affacca à u prima filari, è cù u so ugnomi, nomi è casata veninu dopu è ùn saranu aduprati guasi mai in u seguitu. Si vedi subitu l’ammirazioni di u narratori : ripitizioni di « un tippu ».

Si rimarca una cultura alta pà u so mezu suciali : cultura  taliana (sà Dante à menti) ma cù a ignuranza di u francesi ancu par avè passatu tanti anni in un mezu francofunu. A so cursità hè cum’è una evidenza ancu dopu una carriera in l’armata, in Crimea.

Sicondu a so discrizzioni fisica, hè un omu ribustu è putenti (un omatone, omone) ancu à sitttanta anni, epica chì u narratori l’hà scontru è  l’hà intesu cuntà i so passati.

Si vedi subitu l’uriginalità di a so narrazioni, sempri cù digrissioni chì facinu aspittà a storia annunciata. Si tratta di sicuru d’un aspettu sputicu soiu, ma dinò d’un fattu culturali corsu, chì porta à avvigna u sughjettu inveci di trattà lu direttu.

Subitu in issu prima capitulu, u cuntrastu  linguisticu cù u suldatu pinzutu in Crimea taglia a narrazioni. A storia vera di u rumanzu cumencia cù « Fù un passu curiosu » ma si salta subitu ad altri affari, è u publicu si ni lagna, cum’è in tuttu u libru : « Ma Filidatu è Filimonda ? ». Ma ùn ci volta micca subitu. Si pò paragunà a so forma di narrazioni cù Jacques le Fataliste di Diderot (da veda chivi sottu), duv’è u sughjettu privistu, « les amours de Jacques », hè sempri. impiditu da altri discorsi.

U Pinetu, locu di a storia, si pò cunsidarà cum’è un parsunaghju. Li si parla à u vucativu :  « O Pinetu ». Hè un locu simbolicu d’una civilizazioni, di u passaghju da a machja à i tarri cultivati, è dopu di a ricunquista di a machja.

Cultura :

hè u tempu chì a Corsica cambia cultura alta. U francesi s’hè dighjà impostu cum’è lingua ufficiali, di l’amministrazioni è a ghjustizia, ma da pochi anni. Pà a literatura è l’alti studii, era discritta a situazioni cù a formula taliana : Italia se ne và e Francia non viene ». I Corsi pirdianu à pocu à pocu a cultura taliana senza avè acquistatu a francesa. I lingui stessi sò unu di i sughjetti di u libru. Si custateghja ch’elli ùn dicinu listessa cosa. Si vedi cù asempii corsi ch’elli ùn ponu capì l’altri par mutivi culturali. A lingua và cù un modu di cuncipiscia u mondu, chì struttureghja u pinsamentu è a lingua.

Cumencia à l’epica l’esiliu ecunomicu à essa naturali in a vita di i Corsi. Par avà ùn si tratta ancu di partenza pà u sempri : si parti è si volta, par u indittu dopu una carriera militara micca troppu longa, cum’è Maccu Mahò.

U discorsu di a ghjenti s’arremba nantu à i ricordi storichi : a guerra di Crimea, ma dinò l’armata corsa di « De Paoli » (cù u De adupratu à l’epica). Elementi culturali di primura sò mintuvati : a veghja in ghjiru à u fuconi, mumentu forti di leia suciali, l’arba tabacca cultivata sopra locu.

Fatti di lingua :

A prima parolla hè un gallicisimu intigratu ch’ hè quantu hè : « un tippu » inveci di « un umettu » chì si pudaria aspittà. Dalzeto a saparà ma cerca una lingua cuttidiana, senza idea di prupona mudelli « di qualità ». À tempu sò mintuvati i cursicisimi in francesi (« sentir » par « entendre »).

Traducia in francesi : da « l’omatone » à « ùn ci intendenu ».

Tematica : vita ecunomica è suciali

Assi 1 : una cultura pasturali

I dui ghjovani p 4 à 6 ( da « dunque quand’è no eramu… à « nudu è crudu »).

Ughjittivi :

• studiu literariu : prisintazioni di i parsunaghji più di primura : Filidatu è Filimonda,  a Fregata
• studiu linguisticu : u corsu, lingua metaforica
• cultura : a vita di i pastori in a sucità tradiziunali
• attività : littura passaghju
• scrittura : sintesi
• traduzzioni in francesi

Altri ducumenti d’appoghju :

Arrighjistramenti di pastori : i pastori di l’Onsa, INA 1980

Pierre Jean Luccioni, Esse è campà, Piazzola 2018 Ritrattu p.20 (famille de bergers transhumants)

Ducumentu scrittu p.20 Le mépris au quotidien

Georges Ravis Giordani, Bergers corses

cumentu :

Maccu Mahò ni ghjugni in fatta fini à cumincià a storia annunciata da u principiu. Sò prisintati i dui parsunaghji è quilla chì forsa hà a parsunalità a più forti in u rumanzu, A Fregata.

I dui ghjovani sò prisintati in leia stretta da u principiu. I dui nomi, rarissimi tramindui è forsa invintati apposta pà u rumanzu, anu listessu prefissu (grecu philos, amicu è phileô, amà) è listessu numaru di sillabi. Prima di veda li si sà chì i so bandi di pecuri pascinu guasi insemi in u Pinetu, è si sanu ritruvà s’omu in porta in dirizzioni cuntrarii. Pari ch’ella sprimi a natura stessa ch’elli avaranu un distinu cumunu.

Filidatu : « pullastrone », ghjuvanottu di 17 anni, saria piuttostu goffu sicondu i paragoni scelti. Filimonda : ghjovana di 15 anni, mal assistata ma graziosa è chì pari di livellu più altu cà a so cundizioni.  In fatti Maccu Mahò ùn hè sicuru trattendu si d’ella. Prima a dici « nè bella nè brutta » ma dopu, ricusendu un paragoni veru, a paraguneghja quantunqua cù Santa Lucia in a ghjesgia di u so paesi.

Si trova parechji carattari cumuni trà elli : a puvertà (sò scalzi), a simplicità è ancu a niscintria, ch’ellu pratendi di valurizà Maccu Mahò. Sò «inseparabili » senza parlà d’amori nè mancu essa ni cuscenti, ma ni parlanu i so amichi Villesi, cù riazioni diffarenti di i dui ghjovani.

A Fregata, veduva d’un giandarmu, hè a matrigna « tipica » cum’ella si pò sunnià. Hè auturitaria, narvosa è ancu gattiva  cù a figliastra, chì in fatti hè a vera prupiitaria di i so tarri. A vularia marità cù calchì principali, prima inciampu par Filidatu ch’ella disprezza. Hè pratinziunuta assai, « capivana » è a ghjenti a sà è l’ammasgiuleghja cù belli parolli. Hè campata altrò è ùn si ricunnosci cum’è semplici pastora.

A discrizzioni fisica hè assai più pricisa cà par l’altri parsunaghji, d’altrondi u so cugnomi tocca à a parsona. Sicondu a discrizzioni, bella ùn hè, grassa ma hà i chjappi chì si rimarcanu è chì li anu datu issu cugnomi d’un battellu maistosu. A sensualità hè putenti ind’è u parsunaghju chì pari d’ùn avè varuna altra qualità.

Cultura :

I pastori, divintati una piccula minurità di i Corsi, portanu u ricordu di u campà più anticu è di una cuncipitura ginirali di u spaziu, vinutu da a preistoria. Cf u studiu di De Lanfranchi nantu à i invistiti è i stantari.

Fatti di lingua :

Usu di i metafori è paragoni : rillivà li.

formuli pupulari par isprima si : Filidatu è a so ghjastema chì volta sempri : « Aùh ! Maladetti à… ».

Usu di u pusissivu in corsu : « u babbu ».

Traducia in francesi : « Indeh ! O Filimò » à « in lascia di u babbu ».

Ughjittivi :

• studiu literariu : un cuntrastu tesu assai è a so custruzzioni
• studiu linguisticu : « sgiò » è i parollli parenti ; u cumplementu cù à
• studiu sucio culturali : a ierarchia suciali. Praputenza è risistenza è a so sprissioni
• attività : littura
• scrittura argumintata : sintesi
• traduzzioni in francesi

Altri ducumenti d’appoghju :

Pasquale Ottavi, A serva -canzona d’Alanu Di Meglio cantata da Voce ventu chì ni hè ispirata

Ritrattu d’una parsunalità corsa di u seculu

Paul Bourde, En Corse, l’esprit de clan…, ed. Lacour, 1999

Cumentu :

Si tratta d’una azzioni dura inaspittata. Anu intesu i Villesi chì Filimonda si maritaria cù un sgiò è ùn avianu mutivu da ùn creda ci. Quì affacca a ghjuvanotta intarrurita, cum’elli a spriminu i paragoni culomba/falcu, è a sprissioni fisica di a paura (ingiallita,ecc.). Scappa è si lampa ind’u barracconi, ciò chì voli dì ch’ella cerca l’aiutu. Hè suttimissa à prissioni suciali : a matrigna, i Villesi surpresi è ancu Filidatu impauritu.

Videndu u so affannu i Villesi l’anu da difenda par piità ma ancu pà u so unori ad elli : hà francatu u so sogliu è nimu a devi circà in drentu.

U sgiò Ghjilormu s’hè dighjà prisintatu : hè u figliolu di u sinatori Magrettini, amicu di Napulioni III, prupiitariu di tutti issi lochi. Hà 22 anni. Hè dispiaciutu subitu à Villesi è ancu à a cagna. Cum’è risposta à a so pratinzioni si ni ridinu prestu dendu li u cugnomi Jacquot par via di u nasu à bizzicu di papagallu.

A praputenza :

Pocu sicuru d’ellu, ghjovanu, prova à impona si cù l’auturità di a so sterpa. A faci prima di modu fisicu, avanzendu versu Filimonda. Si vedi u disprezzu suciali par l’altra ghjenti prisenti : parla à Filimonda cum’è s’ellu ùn ci fussi altru nimu. Quand’elli si mettinu à mezu, li parla cù un tonu impirativu : « lasciatemi passà ». Dopu ni veni subitu à i minacci : « ùn sapete », « saperete cum’è mi chjamu », « averanu di e mio nutizie »…Impieca u prima da par ellu a parolla « pratinzione », vultata subitu contru à ellu. Prova à parlà cù l’irunia « anghjuli custodii ». A so « gattivera » faci aspittà u seguitu.

Hà l’appoghju di Maria Cicilia chì hè passata da u so cantu par via di i so spiranzi signurili, chì si sprimi ancu cù a vistitura ricca, mentri chì Filimonda porta sempri i stracci.

Sò intarissanti i formi di a risistenza di i Villesi, adatti à a situazioni : ùn sò in li so lochi è a tarra ùn hè soia. Parlanu sempri cù rispettu à u sgiò, puri minacciati, senza mai tuccà lu, ma tagliendu li a strada in una uppusizioni passiva. Ghjocanu nantu à u numaru è u calmu ch’elli teninu. Si metti in davanti Petrechjone, cum’è u più anzianu (« vechju amicu »). A difesa hè in « a raghjone », a manera di piacia, l’unori corsu (« rispettu »), è u valori sacru di a casa è di quillu chì ci hè intrutu. Vulè ùn vulè, u sgiò devi andà à l’aritrosa davanti à a « guardia vigilente ». I mezi di a risistenza (di u populu in ginirali) sò u numaru, a prisenza forti senza viulenza, è masimu u pesu di valori sicuri, ch’elli ùn ponu cuntistà i principali chì sò in listessa cultura.

Fatti di lingua :

I parolli vinuti da u latinu seniorem : signore, signoru, signora, sgiò.

Impiecu di à dopu un verbu transitivu : « Ci guardò, guardò à Filimonda »

• Sprissioni scritta criativa : imaginà a narrazioni di issi fatti da Filimonda chì senti tuttu da u barracconi
• Traducia in francesi : da « ditemi un pocu » à « cum’è mi chjamu ».

Ughjittivi :

• studiu literariu : cum’elli și pudianu sprima l’idei ind’un mezu pupularu corsu
• studiu linguisticu : struttura di i pruverbii è lucuzioni tradiziunali
• studiu sucio culturali : uppusizioni è raghjunata trà gruppi paisani cuscenti di a so unità.
• attività : littura
• scrittura sintesi
• traduzzioni in francesi

Altri ducumenti d’appoghju :

Racolti di pruverbii : Mattei, Colonna d’Istria, Appinzapalu, Bassani

Da paragunà : Molière,  Dom Juan : Sganarelle è i so pruverbii (chivi sottu).

Cumentu :

Villesi, chì pruteghjinu à Filimonda, è Casinchesi, chì piglianu a pratesa di u sgiò Ghjilormu u so padroni, si scontranu. Ùn nasci subitu a baruffa, prima si discorri. Ogni gruppu hà u so uratori. Ùn si tratta di dialugu veru ma si rispondinu dui munolughi upposti, spezii di « predichi » laichi, duv’è u sughjettu veru ùn uccupa cà una piccula parti di u discorsu. U restu hè fattu cù pruverbii suvitati, chì prisentanu una cuncipitura di a vita. In fatti sò argumenti d’auturità, in una sucità cù valori sicuri ch’ugnunu pratendi di tena li. Ci hè l’accunsentu par issi valori,ch’elli spriminu i pruverbii « ghjusti è santi ». U cuntrastu hè in u modu d’intarprità li in una situazioni cuncreta. Hè dinò una forma di diplumazia : si poni u prubulema è a so suluzioni ma senza criticà i parsoni, o u menu pussibuli, è cusìli  si lascia a pussibulità di rinuncià.

Simbulizeghjanu dinò issi discorsi una unità paisana. L’uratori parla in nomi d’un gruppu è à un altru gruppu, chjamatu di modu sulennu (Casinchesi ! Villesi !). I parsoni scelti par parlà a facinu parch’elli sò cunnisciuti par pudè la fà megliu cà i cumpagni, ma portanu u so parè cullittivu, sò uratori di u gruppu, micca capi.

U discorsu di  Maccu Mahò sprimi cù i pruverbii una visioni di u mondu  :

1. Ci voli sempri à sceglia a paci è micca a guerra ; a collara ci voli à calmà la, è discorra di modu amichevuli è rispittosu.
2. L’amori dumanda l’accunsentu di a donna. Unu innamuratu a devi accittà sì issa donna ùn lu teni caru. Ci voli à piacia li. I guerri pà i donni (cum’è quilla di Troia ch’ellu cunnosci) sò scimità è scumpienti.
3. Par raghjunà ci voli à dì chjaru ciò ch’omu voli.

S’elli si traducinu issi idei ginirali in a situazioni : u sgiò Ghjilormu voli à Filimonda par forza. S’ella ùn lu voli ella, faria megliu à piantà è à lacà la stà.

Ind’è Battifocu, chì si sà uratori menu bonu, s’upponinu i rialità è i discorsi. A so argumintazioni teni in dui punti :

1. I discorsi à spessu ùn sò cà chjachjari par piattà i prubulemi veri. Chì contanu sò i fatti.
2. Ugnunu cumanda ind’è ellu. Casinchesi sò in li so lochi è ùn aspettanu i lizzioni da i frusteri.

Cunclusioni cuncreta : i Villesi riteninu à Filimonda. A devinu fà escia cum’ellu voli u sgiò Ghjilormu.

Si vedi aghjà quì una cunfusioni : Filimonda a dici franca è chjara ciò ch’ella voli. A Fregata voli ch’ella parti ind’è u sgiò Ghjilormu, Casinchesi sò pronti à luttà par ripiglià la senza tena contu di a so scelta ch’elli ùn capiscinu. S’hà da ghjugna à a guerra diretta chì si vulia chisià

Fatti di lingua :

I metafori animali (cavalli, ghjumenti, orsu) è agriculi (pani, tribiu) ;

A struttura d’ogni pruverbiu. A spessu à a siconda parsona è à u impirativu, calchì volta cù una rima interna

Traducia in francesi : da « Ùn sò chè e campane » à « amici cari ».

Strattu di Dom Juan di Molière (V, 2) :

Cum’è Maccu Mahò, u parsunaghju di Molière struttura u discorsu à parta si da pruverbii infilarati. Ma mentri ch’ind’è Maccu Mahò ci hè una logica è un prugressu ver di dicisioni, ind’è Sganarelle à pocu à pocu cumanda a lingua stessa è u significatu si perdi in u ghjocu di i parolli . Ciò ch’ùn impidisci di ghjugna à una cunclusioni ghjusta, ma senza argumintazioni chì ci porti.

Ughjittivi :

• studiu literariu : u puteri di a ghjustizia criticatu cù u comicu.
• studiu linguisticu : livelli di lingua : lingua mischiata, ghjuridica è paisana.
• studiu sucio culturali : suttumissioni di u populu à un puteri citatinu chì parla una altra lingua è piglia dicisioni chì parinu senza capu nè coda.
• attività : littura
• scrittura sintesi
• scrittura criativa : raportu di u veru ghjudici
• traduzzioni in francesi

Altri ducumenti d’appoghju :

Rochiccioli, Cavallaria paisana, cap 12 Parapiglia, ed. CRDP de Corse, 1999

Rochiccioli, Favule : Ghjustizia scimiesca (+ arrighjistramentu)

Lamentu di Ghjuvan Camellu (strufati chì parlanu di a ghjustizia)

Rinatu Coti, A rimigna

Cumentu :

U scontru  di i Villesi cù u tribunali veni à taglià a narrazioni ginirali è nasci da l’azardu. Si tratta d’una visita amichevuli, anu dighjà manghjatu è bitu, ridinu faciuli. In piazza trovanu a ghjenti assai ch’aspetta u ghjudici, in iritardu. Par rida un pocu Paglialonga pruponi « s’eiu mi fessi ghjudice ? ».

Si cumponi da tandu ciò chì si pò chjamà una pezza di teatru, fatta d’una seria di quattru scinetti comichi. Prima comicu hè di situazioni : un ghjudici falsu chì piglia dicisioni scimatichi, parsunaghji mintuvati più spessu cù i cugnomi ridiculi cà cù i casati : Manghjoni è Strambetti, Minervi è Somoprasca, Manetta è Cabriolu. Veninu i prucessi da liti di nulla di vita paisana, chì ùn avarianu da ghjugna finu à un tribunali.

U comicu veni dinò da i riazzioni, di i parsoni ghjudicati è di u piublicu chì ridi, for di Filidatu è Filimonda chì ùn ci capiscinu nulla è chì ùn ispriminu cà a surpresa.

Sottu à l’aspettu comicu, si pò induvinà una critica più seria. Si tratta pà i Villrsi di biffà un puteri minacciosu, è I ghjudicamenti tuntini di Paglialonga ùn sò forsa peghju cà quilli di a ghjustizia di paci vera. È in fatti, anu una certa logica interna, provanu à spessu à andà in un sensu « di paci », fendu chì nimu ci perdi nulla : unu incausatu hè cundannatu à pagà ma l’avvirsariu ùn devi piglià i soldi.

Issa rivolta comica contru à i puteri ùn dura cà un tempu cortu cortu. Cù l’affaccata di u ghjudici volta a solita paura di a riprissioni, è i Villesi scappanu da ùn iscuntrà i giandarmi. Ma anu avutu un mumentu bellu di risa è di rivolta filici.

Cultura :

A vita paisana è i so picculi litichi : pagamenti d’affitti, purcellu chì era una lofia, vacca intruta ind’un chjosu, calciu di sumeru.

Ci si vedi a cumplessità di i raporti interni à a sucità paisana è à tempu trà cumunità corsa è puteri ligali, chì faci a paura ma si n’aspittaria quantunqua un ghjudiziu sinnatu.

Fatti di lingua :

Comicu di u mischiu corsu-francesi ;

vucabulariu ghjuridicu biffatu.

Scrittura criativa : u ghjudici veru hà amparatu ciò chì s’hè passatu è scrivi un raportu à i so supiriori par spiicà ciò ch’ellu hà capitu.

Traducia in francesi :  da «Manetta riclamava » à « rendemi contu ».

Ughjittivi :

• studiu literariu : pezzu di rumanzu d’azzioni ; tema di u banditu, prisintatu di modu comicu in parti.
• studiu linguisticu :
• modu sulennu di sprima si di u falsu Bellacoscia
• studiu sucio culturali :
• scappaticciu è rapimentu ;
• u banditu è a so prisenza suciali
• attività : littura
• scrittura sintesi
• scrittura criativa : u sgiò Ghjilormu conta a passata à u fratellu
• traduzzioni in francesi

Altri ducumenti d’appoghju :

Calchì lamentu di banditu

Ritrattu di Bellacoscia

Banditi, mostra nantu à u banditisimu, museu di Bastia

http://www.bastia.corsica/fileadmin/Usine_a_sites/musee_de_bastia/Expositions/V3_DP_BANDITI_light.pdf

Cumentu :

Si tratta di una situazioni dramatica. U sgiò Ghjilormu ni hè ghjuntu à a viulenza diretta è Filimonda hè stata rapita, cù a bugia ch ‘ella hè malata a matrigna. Si sà prestu induv’ella hè è in mani à quali. Ni nascinu i riazzioni è l’azzioni par ripiglià la.

I Villesi funziuneghjanu sempri in gruppu unitu, numarosu abbastanza, difinditori di valori di ghjustizia. Di sicuru anu una certa paura di i puteri ecunomichi (sgiò) è pulitichi (sgiò è giandarmi) è ùn sceglinu micca una azzioni diretta armata, adopranu piuttostu l’astutezza. Quì facinu intarvena un contraputeri ricunnisciutu è miticu di l’epica, quillu di u banditu, « d’unori » quì. Ci hè un certu risicu à ghjuvà si di u nomi d’un banditu. Si mettinu in piriculu chì quillu, s’ellu fussi missu à capu, a pudaria piglià di mali è vindicà si ni.

Par salvà a ghjuvanotta sò prontu à mudificà i so prughjetti di vultà in casa è à parcorra una strada lunghissima pà i trasporti di l’epica. Hè l’uccasioni di discriva i paisaghji longu strada, è po dopu a valli di u Fangu, rduv’elli ritrovanu lochi di a so cumuna di E Ville.

Filidatu acciaccatu da u rapimentu è paurosu di natura riagisci pocu è micca à principiu. Ma rinvivisci quand’elli li parlanu di circà à Filimonda, è è dopu intarveni di modu curaghjosu è dicisu contru à « l’umatale » o « arcefalu » ch’ellu hà ricunnisciutu cum’è u rapitori..

A passata di u falsu Bellacoscia rimanda un pocu à quilla di u falsu ghjudici, ma quì ùn si tratta più di rida, l’imitazioni hè un mezu d’azzioni seriu chì pò purtà i risichi veri. Si trova quì in attu a riprisintazioni mitulugica di u banditu : barbutu, sempri armatu, chì parla senza annarvà si, di modu raziunali, è chì i so minacci ci vincinu di più pesu.

I fratelli Bonelli (Bellacoscia di u so cugnomi di famiglia), bucugnanesi, sò i banditi i più famosi di l’epica. U più famosu, Antoni, hè statu à a machja da u 1848 à u 1897. S’ellu ghjugni unu d’elli vicinu à Bastia, dà a impurtanza maiò à u rapimentu di Filimonda, ch’ellu veni à posta à salvà. Da rimarcà u discorsu murali contru à u sgiò Ghjilormu, chì difinisci u banditu cum’è rispunsevuli di i valori corsi è capaci à impona li.

Cultura :

U scappaticciu era una di i formi pussibuli di ghjugna à un matrimoniu, u più spessu ricusatu da i famigli o da una d’elli. Quì a Fregata a voli intarprità cusì. Hè un modu accittatu d’appruntà un matrimoniu. Hè listessa pà u manenti è a moglia. S’avvedinu dopu ch’ella ùn hè mancu à pena d’accunsentu a zitella, è ch’ellu si tratta d’un rapimentu. È sì u scappaticciu hè cunsidaratu nurmali, u rapimentu hè vargugnosu, ancu peghju par un sgiò chì apprufitta di u fattu ch’ella hè urfanella è senza prutizzioni a zitella.

Spostu : i modi di ghjugna à u matrimoniu in a sucità tradiziunali

U banditu : cumu si diventa banditu (a vindetta) ? Cumu campa u banditu ? U banditu difindarà sempri  i valori ( banditu d’unori è « parcittori » ?). Sò tutti sughjetti di spostu pussibuli.

• Scrittura : sintesi
• Scrittura criativa : u sgiò Ghjilormu credi sempri d’avè scontru à Bellacoscia è conta l’affari à u fratellu.

Fatti di lingua :

Stilistica particulari di u discorsu di u banditu. Garbatu, sinnatu è purtadori di minacci serii.

Traducia in francesi : da « l’omatone » à « ùn ci intendenu ».

Ughjittivi : studiu literariu

Hè un strattu chì parla d’amori fisicu è di sessualità, sughjettu rarissimu in a literatura corsa, masimu di l’epica. Prisintazioni doppia di i fatti, comichi par Maccu Mahò è u littori, tragichi pà u innamuratu.

• studiu linguisticu : u dialugu, formi è struttura.
• studiu sucio culturali : sguardu è cumentu di a sucità nantu à a vita privata. Urgogliu è passioni.
• Urganizazioni suciali : i mistieri di u Statu.
• attività : littura
• scrittura sintesi
• traduzzioni in francesi

Altri ducumenti d’appoghju :

Arrighjistramenti : un sirinatu, un cuntrastu

Corse, ed. Bonneton, 2006–

Cumentu :

Hè una scena guasi di teatru o di sinemà, rializata pà un spittatori solu (è par quilli chì leghjinu) da Maccu Mahò, solu à cunnoscia i fatti tutti tutti. Parti l’affari da a rimarca niscentri di Filimonda chì hà vistu « quattru pedi sottu à un pelone ». Maccu Mahò  hà capitu a rilazioni trà a Fregata è Fulminente u pidoni, è hà dicisu di palisà a virità à u so amicu passiunatu pà a Fregata.  A faci par aiutà lu sì, ma dinò cù un certu piacè gattivu.

L’uriginalità hè chì  ùn la faci cù i parolli, ma fendu li veda a rialità, à pocu à pocu. Hè chjaru d’altrondi u paragoni cù San Tumasgiu. Si vedi chì Paglialonga, s’ellu ùn la vidissi cù l’ochji ùn la cridaria. À principiu prova à rassiccurà si è cerca spiicazioni : « sò soca parenti ? ».

U mumentu hè à tempu amaru par Paglialonga, privu di i so illusioni d’amori, è alegru par Maccu Mahò, fieru di u risultatu è ironicu assai. Ironicu dinò hè u cantu sempri ripigliatu di u pettirossu, solu à empia u silenziu pisivu. Maccu Mahò avanza pianu pianu ver di una virità chì luci, dendu l’ordini senza spiicà ni u mutivu.

I parsunaghji ussirvati, Maria Cicilia è Fulminente, sò prisintati cum’è un coppiu avvezzu à issi scontri. A scena si passa cum’ellu l’hà annunciata Maccu Mahò, tali è quali : raghjunata, cullazioni è lettu. Elli dinò si ghjocanu una scinetta : rimprovari falsi è invitu sulennu in francorsu : « mon cher fattor ».

Cultura :

Ci hè da rifletta à amori è sessualità in la sucità tradiziunali. Era difficiuli assai à parlà si, à scuntrà si è ancu di più à avè raporti. U sguardu di tutti nantu à tutti ùn piantava mai, cù l’idea pirmanenti di l’unori, micca solu di a parsona, ma di a famiglia. Hè un mutivu par piattà tuttu, ancu trattendu si cum’è quì d’una veduva chì si pudaria creda libara. À tempu, à a Fregata li cunveni di piacia à dui omi à tempu, chì sòtramindui  partiti pussibuli.

Fatti di lingua :

Usu d’un francesi ancu stracciatu in un discorsu corsu. À chì ghjova ? Ci voli à tena à menti chì Maria Cicilia hè andata pocu tempu in Marseglia è ni hè turnata cù pratinzioni signurili è cerca di sfrancisà..

Traducia in francesi : da « « dopu ? dumandò » ‘p.73) à « per l’innamurati».

Ughjittivi :

• studiu literariu : capitulu d’alligria dicisivu pà i dui ghjovani, aiutati da l’amichi
• tudiu linguisticu : ritorica ind’u discorsu di u sgiò Filippu
• studiu sucio culturali : a festa / i sposi.
• attività : littura
• scrittura sintesi
• traduzzioni in francesi

Altri ducumenti d’appoghju :

Arrighjistramentu sirinatu (è sirinatu à i sposi)

arrighjistramentu canti di Natali.

Ghjermana de Zerbi, Cantu nustrale, ed. Albiana, 2009

Lucie Desideri, Almanach de la mémoire et des coutumes

Corse, ed. Bonneton, 2006

Cumentu :

Si tratta d’una piccula scena di teatru, chì u dialugu porta à pocu à pocu ver di a dicisioni, a più di primura s’omu piglia u rumanzu cum’è storia di i dui parsunaghji. Innamurati, ùn la sanu micca da veru è dicisioni ùn ni ponu piglià elli. I so menti zitillini lascianu fà u distinu, riprisintatu quì da i Villesi è ancu di più da u solu à pudè dicida, u sgiò Filippu. Quillu hè u solu ch’abbiii a capacità d’ imponasi à tutti.

Cumencia u passu cù « a surpresa » annunciata, quand’ellu ghjugni u sgiò Filippu, quillu chì hà da arrigulà tuttu, u deus ex machina. Prima cuntinueghja a festa è ùn si parla cà di u magnà è di a so qualità. Prima cambiamentu quand’ellu piglia a parolla u sgiò Filippu. In fatti in una sucità di signuria almenu simbolica, hè u solu à pudè uppona si à i prughjetti scimatichi di u fratellu è cunvincia a Fregata d’accittà un matrimoniu ch’ella ricusava.

Cumencia u discorsu di modu sulennu è garbatu, dopu passa à u sughjettu : hà « un dissegnu », di strigna l’amicizia. Tandu diventanu i so parolli dicisi è diretti. A storia ridicula ch’ellu conta Maccu Mahò ni metti in dubbitu a pussibulità, par mancanza di l’anelli, sempri cù a so forma indiretta è garbata di sprissioni cù pruverbii è stalvatoghji. Parla sempri cusì, ancu di più cù u sgiò Filippu ch’ellu ùn voli cuntrarià.

Si ghjugni à a cunclusioni cuncreta : l’anelli l’hà purtati u sgiò Filippu è si ponu fidanzà subitu i dui ghjovani. Si vedi sempri a niscintria, masimu di Filidatu chì ci voli una certa prissioni di u gruppu par ch’ellu basgi a sposa.

Si suveta in sottu a storia di a Fregata è Paglialonga, chì faci veda ch’ellu ùn hà rinunciatu à a so passioni. Ancu s’ellu li lagna d’ella prova sempri à cunquistà la

Finisci u testu cù a dumanda ginirali di u populu ch’ellu fia un discorsu Maccu Mahò, indichendu ni u sughjettu cunvinutu. Hè u segnu à tempu di u piacè di senta « parlà bè » è di a parità ricircata cù u sgiò : ghjenti chì sà parlà, ni anu ancu elli i paisani.

Cultura 

A festa di Natali in Corsica : spostu

Cumu si pudia dicida un matrimoniu in a sucità antica corsa : amicizia, attaccar, abbracciu, scappaticciu. Spostu.

Fatti di lingua :

Ritorica sulenna ind’è u sgiò Filippu. Cumu si sprimi ? Lessicu, strutturi for d’usu pupularu (« di u quale »), ecc..

Traducia in francesi : da « à mezu à l’alegria » à « m’incaricai di a risposta ».

Ughjittivi :

Studiu literariu : si tratta d’un capitulu discrittivu chì prisenta a vita di i travagliadori di a campagna, ma à tempu un pocu teoricu nantu à u travagliu agriculu valurizatu.

• studiu linguisticu : usu di i tempi virbali in corsu :
• studiu sucio culturali : i piaghji in tempu di i zinzali è di a malaria.
• attività : littura
• scrittura sintesi
• Chì voli dì « pazienza » in corsu ?
• Traduzzioni in francesi

Altri ducumenti d’appoghju :

Derex Jean-Michel, Géographie sociale et politique du paludisme et des fièvres intermittentes… Revue Histoire, économie et société 2008/2, pages 39 à 59

Filmu nantu à l’affari d’Aleria (INA)

https://www.ina.fr/recherche/search?search=aleria+1975

Paoli di Tagliu, Lamentu di u castagnu (fini)

Poli Michele, À umbria è à sulia (U cimiteriu di l’Elefanti), ed. CNDP-CRDP de Corse, 2002

Cumentu

Sò discritti i dificultà cuncreti par campà : u sucessu o a ruvina, tuttu dipendi di i staghjoni, ma i paisani sò pronti à adattà si ad ogni circustanza. Ùn impidiscinu i dificultà di veda a billezza di a natura è di i staghjoni (« estate, estate ! »)

Hè proposta una filusuffia stoica chì accetta a cundizioni umana suttimissa à l’ordini di u mondu : vita longa o corta, cum’ellu a facinu veda i distini sfarenti di i parsunaghji villesi. À tempu a morti metti à paru a ghjenti d’ogni livellu suciali.

Ma da a cundizioni naturali di l’omu in ginirali l’autori voli distingua ciò chì si pudaria migliurà sicondu i scelti pulitichi è suciali di « u guvernu ». L’asempiu più chjaru hè a malaria chì cuntinueghja à arruvinà tanti viti par mancanza d’una vera pulitica par sradicà la.Hè quistu un tema di prutesta maiò dopu a prima guerra : ancu cù i sacrifizii fatti da i Corsi, ùn si faci nulla par l’isula. In u filu di i scelti pulitichi di Dalzeto, ci si trova ancu una chjama à l’azzioni cumuna, ma cù poca spiranza di successu (« S’è no vulessimu… »).

Dalzeto passa è veni in issu testu trà issi dui parè, chì ùn sò cuntradittorii : l’accittazioni di l’ordini fatali di u mondu è l’idea chì a criazioni umana hà un gran valori è chì a vita pudaria essa più bella cù l’azzioni cullittiva.

Cultura :

A storia di a piaghja in Corsica : prupiità cumunitaria o statali, locu d’impiaghjera in tempi di a malaria, nuvità dopu ch’ella fù sparita : agricultura nova, affari d’Aleria.

Fatti di lingua :

• Usu di i tempi virbali in corsu è in francesi : imparfettu, passatu landanu, cundiziunali prisenti è passat
• Sprissioni di u cundiziunali in corsu.

Traducia in francesi : da « Debuli o punti » à « rimediallu ».

• studiu literariu : l’epilogu hà dui tempi : u ritornu da u Pinetu à e Ville cù i riflissioni chì l’accumpagnanu ; u ritrovu di a casa è di a so paci.
• studiu linguisticu : usu di i tempi virbali in corsu : imparfettu, passatu landanu, cundiziunali prisenti è passatu. Da paragunà cù u francesi è u talianu.
• studiu sucio culturali : a vita paisana, i so guai, i so frastorni è i so piacè.
• scrittura sintesi : l’ideulugia ch’ellu sprimi Maccu Mahò, in issa chjudenda è in tuttu u libru.

Imaginà u seguitu di a vita di i parsunaghji chì stanu in u Pinetu, Filidatu, Filimonda è a Fregata.

Altri ducumenti d’appoghju :

• Casa antica di paese, di i fratelli Vincenti, cantata da Antoine Ciosi
• Franchi Ghjuvanghjaseppiu, Casa, in Canzone di ciò chì passa, CNDP-CRDP de Corse, 1997
• Les maisons traditionnelles des villages de Corse

https://maison-monde.com/maisons-traditionnelles-villages-corse/

Cumentu :

Cum’ellu hà dui principii è dui fili intricciati, u rumanzu hà dui chjudendi. Si situeghja a prima in fini di u capitulu 6. Dopu a gran festa di u so matrimoniu, Filidatu è Filimonda vanu à chjinà si, è i Villesi si ni vanu. A siconda chjudenda hè in l’epilogu. Si volta à u tempu chì Maccu Mahò vechju conta a storia di i dui ghjovani. Dopu a cunclusioni di l’evenimenti, veninu a cunclusioni di a narrazioni è a filusuffia di a vita di u narratori (è di l’autori, si pò creda). Maccu Mahò hè u solu parsunaghju prisenti da u prima filari è l’ultimu, è u solu à pudè analizà tuttu.

U principiu di u testu prisenta un bilanciu di i fatti stalvati. S’intarrugheghja omu dinò nantu à a Fregata è u so distinu. U puntu annantu à a situazioni ecunomica di i Villesi faci veda una filusuffia muderata : « omancu di u necessariu ». Di primura hè a chjama d’un mondu cunnisciutu è prutittori : u nostru paese, casa nostra, i nostri lochi.

A brama di u gruppu hè di riposu è di tranquillità. Anu i Villesi a vulintà di scurdà si di i mumenti dulurosi ma dinò di i mumenti di filicità troppu forti. Si cerca a muderazioni.

A vista di u paesi duv’ellu ghjugni u soli hè a metafora di a vita sirena è linda chì l’aspetta. Dopu l’unità di u travagliu è di l’azzioni, ugnunu ritrova a so famiglia è a so casa, ma a cunclusioni data da Muscatella hè ripigliata da tutti insemi è hè l’ultima frasa di u libru.

Cultura :

A nuzioni d’asgiu in corsu. Spostu urali.

Fatti di lingua :

Usu di i tempi : u passatu landanu è u passatu quancianu.

Sprissioni di u cundiziunali in corsu.

Traducia in francesi : da « Ci ne partimu » à « tribulazione ».